Halaga ng Piso

Lantad sa 'tin yaong daya niring mundo,

mayrong araw at kung minsa'y bumabagyo,

kapalara'y isang bugtong at 'di piho,

bago pa man maging huli'y magseryoso,

maigi na na sa buhay sigurado.

Hindi baga at mainam kung payapa,

ating puso at isipa'y walang luha,

at sa káting karukhaa'y 'di kakapa,

hindi butas yaong bulsa at mataba,

ang pitaka, sabihin mang isang dukha.

Kailanga'y naiiba sa 'ting gusto,

ang pagwaldas na 'di batid ay 'sang luho,

mahalaga ang piraso kahit singko,

'pag naipon bawat butil mandi'y piso,

balang araw pakinabang isang ginto.