Ihinto ang Pang-aabusong Sekswal

Humahagod hanggang hita ang pagdausdos ng mata‚

ang mga titig ay may halong pananabik‚

ninanais makaramdam ng kaunting romansa‚

sa katawan na tatahi-tahimik.

Walang paalam kung mang-abuso‚

humihipo’t nanghahalik nang biglaan‚

walang lugar o panahon na pinipili‚

kung ang nag-iinit na ay katawan.

Ilan pa kaya ang magiging biktima?

Ng pang-aabusong hanggang ngayon ay talamak‚

ni wala na ring binabatayang relasyon‚

nagiging biktima maging mismong anak.

Ang sekswal na pang-aabuso ay dapat mahinto‚

nagtatanim ito ng habang buhay na takot‚

lalo’t kung ito’y wala namang permiso‚

hindi agad nababaon sa limot.

Nagmamay-ari tayo ng sari-sariling katawan‚

’di ginawa upang abusuhin lamang‚

isang sagradong bagay na ’di basta-basta hinahawakan‚

lalo’t kung walang pahintulot na nakalaan.

Hindi sa ikli o haba ng damit‚

hindi sa edad o hubog ng katawan‚

kung ang mata ay biglang naakit‚

nagiging aktibo ang tawag ng laman.

...

Ihinto ang Pang-aabusong Sekswal - Young Pilipinas Poetry