Kahariang Puso

Kahariang Puso by Ronjo Cayetano (Young Pilipinas Poetry)

Tulad ng 'sang lagalag, tangan-tanga'y basura,

Musika ng kalamnan, pagkalam ng sikmura.

Daigdig n'yang tungtunga'y bunggalong walang kulay,

Isang mahabang ilog, subalit walang buhay.

Kaloobang dalisay, sa rungis nagkukubli,

May pusong mapagbigay, dukha mang nakatali.

Wala man s'yang tirahang kanyang maituturing,

Tahanan niya'y puso— Diyos sa kanyang piling.

Kung sakali mang mundo ay maglaho't mabura,

Ako ay mananahan, sa pusong 'di nagsara.

Sa piling ni Bathala, na sa'kiy gumagabay,

Hininga ko na hiram, sa Kanya'y ibibigay.