Patay na Halik

Pangarap ng isang bulilit sana bukas ay matupad;

laging nasa munting isip maging mahusay na pulis.

Kulong s'ya sa kahirapan, sa sakahan ay alagad,

gugol oras sa trabaho kahit ang swerte ay lihis.

Matayog man ang pangarap, nais n'ya pa ring maabot;

hinusayan sa pagsaka upang maahon pamilya.

At inani n'ya ang bunga, kasaganaa'y pinulot;

sa pag-aaral n'yang lubos, ngayon ay nakatapos na.

At pagiging pulis natupad sa murang edad na bente,

lubos ang ngiti sa muka siya ay ipinagmalaki,

ngunit tumangis pamilya nang may sakit s'yang kinubli,

sa paghimlay sa kabaong baril ay nilagay sa tabi.